Dokumenti tal-ivvjaġġar għall-membri tal-familja li mhumiex mill-UE

Ivvjaġġar fl-UE mal-membri tal-familja tiegħek li mhumiex mill-UE

Jekk int ċittadin tal-UE u qed tgħix jew qed tivvjaġġa lejn pajjiż ieħor tal-UE, il-familja tiegħek tista’ tingħaqad miegħek, inklużi membri ewlenin tal-familja li mhumiex ċittadini tal-UE. Jekk, pereżempju, int ċittadin Franċiż li tgħix l-Italja, u l-konjuġi tiegħek huwa/hija ċittadin(a) tal-Istati Uniti, dawn jistgħu jingħaqdu miegħek fl-Italja.

Madankollu, dan ma japplikax għall-pajjiż tan-nazzjonalità tiegħek. Jekk, pereżempju, int ċittadin Ġermaniż u l-membri tal-familja tiegħek li mhumiex mill-UE jridu jingħaqdu miegħek fil-Ġermanja japplikaw ir-regoli nazzjonali.

Skont il-pajjiż li ġej minnu, il-membru tal-familja tiegħek li mhux mill-UE jista’ jkollu bżonn viża. Jekk tkun meħtieġa viża, din għandha tkun mingħajr ħlas u tinħareġ skont proċedura ta’ applikazzjoni aċċellerata bħala membru ewlieni tal-familja ta’ ċittadin tal-UE (ara l-informazzjoni dwar l-applikazzjoni għal viża hawn taħt).

Membri tal-familja ewlenin u estiżi tiegħek li mhumiex mill-UE

Il-membri ewlenin tal-familja tiegħek li mhumiex mill-UE jirreferu għall-konjuġi tiegħek, uliedek, dixxendenti dipendenti, ġenituri dipendenti jew nanniet dipendenti. Dan japplika wkoll għas-sieħeb/sieħba rreġistrat/a mhux mill-UE iżda biss jekk il-pajjiż li qed jivvjaġġaw fih jikkunsidra s-sħubiji rreġistrati bħala ekwivalenti għaż-żwieġ.

Taħt ċerti kundizzjonijiet, membri oħra estiżi tal-familja li mhumiex mill-UE li jivvjaġġaw miegħek jew li jingħaqdu miegħek jistgħu jkunu intitolati wkoll għal proċedura ta’ applikazzjoni aċċellerata għal viża: aħwa, kuġini, zijiet, kif ukoll is-sieħeb/sieħba tiegħek ta’ tul ta’ żmien twil li mhumiex mill-UE. Dan japplika wkoll għal sħubiji rreġistrati f’pajjiżi fejn is-sħubiji rreġistrati ma jitqisux bħala ekwivalenti għaż-żwieġ. Il-pajjiżi tal-UE mhumiex marbutin awtomatikament li jiffaċilitaw id-dħul tagħhom, iżda għandhom jikkunsidraw it-talba.

Twissija

Iċċekkja r-regoli eżatti fis-seħħ fil-pajjiż fejn qed jivvjaġġa l-membru tal-familja estiż mhux mill-UE tiegħek.

Rekwiżiti tal-passaport u tal-viża

Il-membri tal-familja li mhumiex mill-UE għandhom iġorru fuqhom passaport validu u, skont il-pajjiż li ġejjin minnu, jista' jkun li jeħtieġu viża ta' dħul. Jekk ikollhom dokument ta’ residenza (karta jew permess) jistgħu jkunu eżentati mir-rekwiżiti tal-viża (ara l-għodda hawn taħt). Hemm lista ta’ pajjiżi li ċ-ċittadini tagħhom m’għandhomx bżonn viża biex iżuru l-UE għal soġġorni qosra sa 90 jum fi kwalunkwe perjodu ta’ 180 jum. Ikkuntattja l-konsulat jew l-ambaxxata tal-pajjiż li se tkunu qed tivvjaġġaw fih sew qabel iż-żmien biex tkun taf x'dokumenti l-membru tal-familja tiegħek li mhux mill-UE se jintalab jippreżenta mal-fruntiera. L-informazzjoni dwar id-dokumenti tal-ivvjaġġar u l-viżi pprovduta hawnhekk tapplika wkoll għall-ivvjaġġar lejn l-Iżlanda, il-Liechtenstein, in-Norveġja u l-Iżvizzera.

Twissija

Ir-rekwiżiti tal-viża għall-ivvjaġġar lejn l-Irlanda huma kemxejn differenti minn dawk għal pajjiżi oħra tal-UE. Iċċekkja l-informazzjoni pprovduta mill-awtoritajiet Irlandiżi en .

Rekwiżiti tal-viża għal membri tal-familja mhux mill-UE b’dokument ta’ residenza

Jekk il-membru tal-familja tiegħek mhux mill-UE għandu karta ta’ residenza jew permess ta’ residenza maħruġ minn pajjiż taż-żona Schengen, jista’ ma jkollux bżonn viża. Uża l-għodda ta’ hawn taħt, iċċekkja jekk għandhomx bżonn viża tad-dħul għall-pajjiż li qed jivvjaġġaw fih.

X’tip ta’ dokument ta’ residenza għandu l-membru tal-familja tiegħek li mhux mill-UE?

Il-membru tal-familja tiegħek li mhux mill-UE m’għandux bżonn viża jekk ikollu karta ta’ residenza.

  • B’din il-karta ta’ residenza (jew karta ta’ residenza permanenti) jistgħu jivvjaġġaw mingħajr viża lejn il-pajjiżi kollha tal-UE (inkluż il-pajjiż tan-nazzjonalità tiegħek) kif ukoll lejn l-Iżlanda, il-Liechtenstein u n-Norveġja, anke mingħajr ma jkunu akkumpanjati minnek. Dan japplika irrispettivament minn liema pajjiż tal-UE tkun ħarġet il-karta ta’ residenza tiegħu u l-pajjiż li jkun qed iżur.

Twissija

Eċċezzjoni għall-Iżvizzera

Il-membru tal-familja tiegħek li mhux mill-UE jista’ jivvjaġġa wkoll mingħajr viża lejn l-Iżvizzera, ħlief jekk il-karta ta’ residenza tiegħu tkun inħarġet minn Ċipru jew l-Irlanda.

L-Iżvizzera ma toħroġx karti ta’ residenza lill-membri tal-familja ta’ ċittadini tal-UE iżda permessi ta’ residenza (iċċekkja r-regoli rilevanti pprovduti mill-awtoritajiet Żvizzeri dwar il-permessi ta’ residenza de en fr ).

Storja bħala eżempju

Id-detenturi ta’ karta ta’ residenza bħala membru tal-familja ta’ ċittadin tal-UE m’għandhomx bżonn jiksbu viża

Ying, il-mara Ċiniża ta’ ċittadin Ġermaniż li jgħix il-Finlandja, kienet inħarġitilha karta ta’ residenza bħala membru ta’ familja ta’ ċittadin tal-UE fil-Finlandja. Ying u żewġha jixtiequ jivvjaġġaw lejn ir-Rumanija fil-ħarifa. Peress li Ying għandha passaport validu u karta ta’ residenza ta’ membru ta’ familja tal-UE, mhix meħtieġa li tikseb viża ta’ dħul biex tivvjaġġa lejn ir-Rumanija.

Storja bħala eżempju

Id-detenturi ta’ karta ta’ residenza bħala membru tal-familja ta’ ċittadin tal-UE m’għandhomx bżonn jiksbu viża

Marek huwa ċittadin Ċek. Huwa joqgħod ma’ Meera, il-konjuġi Indjana tiegħu fil-Bulgarija. Meera għandha passaport validu u karta ta’ residenza bħala membru tal-familja tal-UE maħruġa mill-Bulgarija. Meera tivvjaġġa waħedha lejn Franza u mbagħad lejn l-Irlanda fuq btala. Peress li Meera għandha passaport validu u karta ta’ residenza, m’għandhiex bżonn tikseb viża ta’ dħul biex tivvjaġġa lejn xi wieħed minn dawk it-2 pajjiżi, anki jekk tivvjaġġa waħedha.

Lejn liema pajjiż qed tivvjaġġa?

Il-membru tal-familja tiegħek li mhux mill-UE għandu dokument ta’ residenza maħruġ minn pajjiż taż-żona Schengen u qed jivvjaġġa lejn pajjiż taż-żona Schengen

  • Il-membru tal-familja tiegħek li mhux mill-UE m’għandux bżonn viża jekk ikollu permess ta’ residenza (permess ta’ residenza nazzjonali) maħruġ skont ir-regoli nazzjonali minn pajjiż ta’ Schengen.

Il-membru tal-familja tiegħek li mhux mill-UE għandu dokument ta’ residenza maħruġ minn pajjiż taż-żona Schengen u qed jivvjaġġa lejn pajjiż mhux taż-żona Schengen

  • Il-membru tal-familja tiegħek li mhux mill-UE se jkollu bżonn viża jekk qed jivvjaġġa lejn l-Irlanda.
  • Il-membru tal-familja tiegħek li mhux mill-UE m’għandux bżonn viża jekk qed jivvjaġġa lejn Ċipru.

Storja bħala eżempju

Anke jekk għandek permess ta’ residenza nazzjonali maħruġ minn pajjiż ta’ Schengen, tista’ tkun meħtieġa viża ta’ dħul biex tivvjaġġa lejn l-Irlanda

Joyce, Niġerjana, tgħix in-Netherlands mar-raġel Olandiż tagħha Luuk. Bħala membru tal-familja ta’ ċittadin Olandiż, Joyce inħarġilha permess ta’ residenza Olandiż fin-Netherlands. Joyce tixtieq issiefer ma' Luuk fuq il-vjaġġ ta’ negozju tiegħu li jmiss lejn Dublin. Peress li l-Irlanda mhix parti miż-żona Schengen, u ma tirrikonoxxix il-permessi ta’ residenza tal-pajjiżi taż-żona Schengen, Joyce trid tikseb viża tad-dħul biex tivvjaġġa lejn l-Irlanda ma' Luuk.

Lejn liema pajjiż qed tivvjaġġa?

Il-membru tal-familja tiegħek li mhux mill-UE għandu dokument ta’ residenza maħruġ minn pajjiż mhux taż-żona Schengen u qed jivvjaġġa lejn pajjiż taż-żona Schengen

  • Il-membru tal-familja tiegħek li mhux mill-UE se jkollu bżonn viża.

Il-membru tal-familja tiegħek li mhux mill-UE għandu dokument ta’ residenza maħruġ minn pajjiż mhux taż-żona Schengen u qed jivvjaġġa lejn pajjiż mhux taż-żona Schengen

  • Il-membru tal-familja tiegħek li mhux mill-UE se jkollu bżonn viża, jekk għandu permess tar-residenza maħruġ mill-Irlanda u qed jivvjaġġa lejn Ċipru.
  • Il-membru tal-familja tiegħek li mhux mill-UE se jkollu bżonn viża, jekk għandu permess ta’ residenza maħruġ minn Ċipru u qed jivvjaġġa lejn l-Irlanda.

Applikazzjoni għal viża ta’ dħul għal waqfiet qosra sa 90 jum

L-informazzjoni pprovduta hawnhekk tapplika għall-ivvjaġġar lejn is-27 pajjiż tal-UE u lejn l-Iżlanda, il-Liechtenstein, in-Norveġja u l-Iżvizzera. Madankollu, xi regoli speċifiċi jistgħu japplikaw għall-ivvjaġġar lejn l-Iżvizzera (iċċekkja l-informazzjoni dwar il-viżi pprovduta mill-awtoritajiet Żvizzeri en ).

Jekk il-membri tal-familja tiegħek li mhumiex mill-UE tinħtiġilhom viża tad-dħul, għandhom japplikaw għal waħda minn qabel mingħand il-konsulat jew l-ambaxxata tal-pajjiż li jixtiequ jivvjaġġaw fih. Jekk se jivvjaġġaw miegħek jew se jingħaqdu miegħek (f’pajjiż tal-UE li mhux il-pajjiż tan-nazzjonalità tiegħek), il-viża tagħhom għandha tiġi pproċessata malajr kemm jista’ jkun abbażi ta’ proċedura aċċellerata, mingħajr ħlas. Iż-żminijiet tal-ipproċessar għal applikazzjonijiet għal viża ta’ membri tal-familja li mhumiex mill-UE li jaqbżu l-15 jum għandhom ikunu eċċezzjonali u debitament ġustifikati.

Twissija

Il-membru tal-familja tiegħek li mhux mill-UE għandu jindika b’mod ċar fuq il-formola tal-applikazzjoni tal-viża tiegħu li qed japplika għal viża ta’ dħul bħala membru tal-familja ta’ ċittadin tal-UE. Jekk dan ma jkunx ċar fil-formola tal-applikazzjoni, dawn jista’ jinħarġilhom tip ta’ viża ħażin li jintalbu jħallsu għaliha.

Applikazzjoni għal viża - dokumenti ta’ sostenn għall-membri tal-familja li mhumiex mill-UE

Il-membru tal-familja tiegħek li mhux mill-UE għandu jinkludi d-dokumenti li ġejjin mal-applikazzjoni għall-viża tiegħu (mhu meħtieġ ebda dokument ieħor):

  • passaport validu
  • karta tal-identità valida jew passaport validu tal-membru tal-familja tal-UE
  • dokument li juri r-rabtiet familjari maċ-ċittadin tal-UE (eż. ċertifikat taż-żwieġ, ċertifikat tat-twelid, eċċ.) u, jekk applikabbli, prova tad-dipendenza, it-tul taż żmien tas-sħubija, eċċ...
  • prova li se jakkumpanjaw jew jingħaqdu maċ-ċittadin tal-UE fil-pajjiż ospitanti tal-UE, jiġifieri:
    • prova li ċ-ċittadin tal-UE huwa diġà residenti jew preżenti fil-pajjiż ospitanti tal-UE (eż. ċertifikat ta’ reġistrazzjoni validu maħruġ mill-pajjiż ospitanti)
    • jekk iċ-ċittadin tal-UE għadu mhux preżenti fil-pajjiż ospitanti tal-UE: dikjarazzjoni li ċ-ċittadin tal-UE se jivvjaġġa lejn il-pajjiż ta’ destinazzjoni tal-UE

Rifjut u appell għal viża

Il-membru tal-familja tiegħek li mhux mill-UE jista’ jiġi rrifjutat viża biss għar-raġunijiet li ġejjin:

  • huma jonqsu milli juru li
    • huma membri tal-familja tiegħek (u li int tgħix jew se tivvjaġġa lejn pajjiż tal-UE li mhux il-pajjiż tan-nazzjonalità tiegħek)
    • se jingħaqdu miegħek jew jakkumpanjawk (iċ-ċittadin tal-UE) f’dak il-pajjiż

Pajjiż tal-UE jista’ wkoll jirrifjuta applikazzjoni għal viża għal raġunijiet marbuta ma’ “politika pubblika, sigurtà pubblika jew saħħa pubblika”. Jekk dan iseħħ, l-awtoritajiet għandhom juru li int jew il-membri tal-familja tiegħek huma "ta' theddida ġenwina, attwali u serja biżżejjed". Pajjiż tal-UE jista’ wkoll jirrifjuta applikazzjoni għal viża għal raġunijiet marbuta ma’ abbuż jew frodi.

Il-familja tiegħek li mhijiex mill-UE trid tiġi nnotifikata bir-rifjut bil-miktub, b’dikjarazzjoni tar-raġunijiet fattwali u legali speċifiċi kollha li fuqhom tkun ittieħdet id-deċiżjoni, u li tispeċifika kif tappella u sa meta.

Tul tas-soġġorn

Jekk il-membri tal-familja tiegħek li mhumiex mill-UE għandhom id-dokumenti meħtieġa, huma intitolati li jakkumpanjawk jew jingħaqdu miegħek mingħajr ebda kundizzjoni jew formalità għal perjodi konsekuttivi sa 3 xhur għal kull pajjiż tal-UE li jżuru. Mhumiex soġġetti għal-limitazzjoni ġenerali ta’ sa 90 jum f’perjodu ta’ 180 jum li tapplika fiż-żona Schengen. Tista’ tikkombina soġġorni f’pajjiżi differenti tal-UE mingħajr limitu ta’ żmien ġenerali (sakemm jiġu ssodisfati l-kundizzjonijiet tar-regoli tal-UE dwar ir-residenza).

Storja bħala eżempju

L-ebda limitu ta’ żmien globali għall-membru tal-familja tiegħek li mhux mill-UE meta jingħaqad miegħek jew iżur diversi pajjiżi tal-UE miegħek

Marco, ċittadin Taljan huwa residenti fi Franza. Bħala parti minn proġett ta’ riċerka fl-UE kollha, huwa qatta’ 3 xhur fl-Awstrija u 3 xhur fil-Ġermanja qabel ma kkonkluda l-proġett b’soġġorn ta’ xahrejn fil-Lussemburgu. Il-konjuġi Amerikana tiegħu Susan kienet intitolata li tingħaqad ma’ Marco għat-tul kollu tas-soġġorn tiegħu barra mill-pajjiż minħabba li, b’passaport validu u dokument ta’ residenza, is-soġġorni tagħha fid-diversi pajjiżi tal-UE ma kinux soġġetti għal limitu ta’ żmien globali.

Meta l-membru tal-familja tiegħek li mhux mill-UE jivvjaġġa waħdu u ma jkollux karta ta’ residenza jew permess ta’ residenza validu, japplika r-reġim normali (fiż-żona Schengen, il-limitazzjoni ta’ 90 jum f’perjodu ta’ 180 jum).

Kif tapplika għal karta ta' residenza bħala membru tal-familja ta’ ċittadin tal-UE

Jekk int f’pajjiż tal-UE li mhux il-pajjiż tan-nazzjonalità tiegħek, u l-membru tal-familja tiegħek li mhux mill-UE qed jippjana li jibqa’ hemm għal aktar minn 3 xhur, jistgħu japplikaw għal karta ta’ residenza mal-wasla. Din għandha tinħareġ mill-awtoritajiet fi żmien 6 xhur mid-data tal-applikazzjoni. Jekk il-viża tal-membru tal-familja tiegħek li mhux mill-UE tiskadi qabel ma tinħareġ il-karta ta’ residenza tagħhom, ma jkollhomx għalfejn jirritornaw lejn il-pajjiż ta’ oriġini tagħhom biex jiksbu viża ġdida.

Matul l-ipproċessar tal-applikazzjoni tal-karta ta’ residenza tiegħu, il-membru tal-familja tiegħek li mhux mill-UE jista’ jiffaċċja diffikultajiet prattiċi waqt li jkun qed jivvjaġġa, pereżempju, jekk jitlaq mill-pajjiż ta’ residenza tiegħu fl-UE u jipprova jerġa’ jidħol. Mingħajr karta ta’ residenza mhumiex eżentati mir-rekwiżiti tal-viża u l-viża ta’ dħul inizjali tagħhom setgħet skadiet. F’dan il-każ, l-ivvjaġġar tagħhom lejn u mill-pajjiż ospitanti tal-UE tagħhom għandu jiġi ffaċilitat. Il-membru tal-familja tiegħek li mhux mill-UE għandu jiċċekkja mal-awtoritajiet fil-pajjiż ospitanti tal-UE jekk japplikawx kundizzjonijiet speċifiċi, jew jekk humiex meħtieġa dokumenti li jippermettu r-ritorn tagħhom.

Twissija

Jekk tgħix barra l-UE u l-membru tal-familja tiegħek li mhux mill-UE jakkumpanjak jew jivvjaġġa lejn il-pajjiż tal-UE tan-nazzjonalità tiegħek jista’ jagħti l-każ li jkollhom bżonn viża u li jkollhom iħallsu xi tariffi tal-viża.

Wasla mal-fruntiera mingħajr viża ta' dħul

Il-membri tal-familja tiegħek li mhumiex mill-UE għandhom ikunu mgħarrfin sew minn qabel u jkollhom id-dokumenti meħtieġa kollha qabel ma jibdew il-vjaġġ tagħhom. Madankollu, jekk jaslu fil-fruntiera bil-passaport tagħhom iżda mingħajr viża tad-dħul, jekk meħtieġa, l-awtoritajiet tal-fruntieri jridu jagħtuhom kull opportunità raġonevoli biex jagħtu prova b’mezzi oħra li huma membri tal-familja ta’ ċittadin tal-UE (pereżempju ċertifikat taż-żwieġ jew ċertifikat tat-twelid) u, prova li qed jingħaqdu jew jakkumpanjaw liċ-ċittadin tal-UE (pereżempju, prova li ċ-ċittadin tal-UE diġà huwa residenti jew preżenti fil-pajjiż fejn qed jintalab id-dħul). Jekk jirnexxilhom jagħtu prova ta’ dan, u jekk ma jkun hemm l-ebda evidenza li huma ta’ riskju għall-ordni pubbliku, is-sigurtà pubblika jew ir-rekwiżiti tas-saħħa pubblika, il-viża trid tinħareġ mingħajr dewmien fil-fruntiera. Jekk jogħġbok kun af li l-obbligu tal-provi jaqa’ fuq il-membru tal-familja.

Huwa rrakkomandat ħafna li l-membri tal-familja tiegħek li mhumiex mill-UE jġorru l-passaport u l-viża tagħhom (jekk meħtieġa) sabiex ikunu jistgħu jidentifikaw lilhom infushom jekk jitwaqqfu mill-pulizija, jitilgħu fuq ajruplan, eċċ. F’xi pajjiżi tal-UE dan huwa rekwiżit legali u jistgħu jiġu imposti sanzjonijiet jekk dan l-obbligu ma jiġix rispettat.

Jekk il-membri tal-familja tiegħek qed ikollhom diffikultajiet biex jiksbu viża, tista' tikkuntattja lis-servizzi ta' assistenza Iftaħ bħala link estern tagħna

Rifjut tad-dħul

F'każijiet rari ħafna, pajjiż tal-UE jista' jirrifjuta d-dħul tiegħek jew ta' membri tal-familja tiegħek minħabba raġunijiet ta’ "politika pubblika, sigurtà pubblika jew saħħa pubblika". Dan ifisser li l-awtoritajiet għandhom jippruvaw li int jew il-membri tal-familja tiegħek huma "ta' theddida ġenwina, preżenti u serja biżżejjed". Int intitolat li tingħata din id-deċiżjoni bil-miktub, fejn ikunu ddikjarati r-raġunijiet kollha, u li fiha jiġi speċifikat kif tista' tappella u ż-żmien li għandek biex tkun tista' tagħmel dan.

Ara wkoll:

Aqra aktar dwar id-drittijiet ta’ residenza tal-membru tal-familja li mhux mill-UE jekk huma jiċċaqalqu miegħek lejn pajjiż ieħor tal-UE.

Dokumenti li teħtieġ għall-ivvjaġġar fl-UE

Portal tal-UE dwar l-Immigrazzjoni en es fr pt

Mistoqsijiet frekwenti

Leġiżlazzjoni tal-UE

Teħtieġ l-għajnuna mis-servizzi ta’ assistenza?

Ikkuntattja s-servizzi ta' assistenza speċjalizzata

Ikseb parir dwar drittijietek fl-UE / Solvi problemi ma’ entità pubblika

Tista’ tuża wkoll l-faċilità għas-sejbien tas-servizzi tal-assistenza biex issib l-għajnuna t-tajba għalik.

L-aħħar verifika: 05/09/2024
Ikkondividi din il-paġna