Bejgħ tal-prodotti fl-UE
Bħala negozju b'kummerċ fl-Ewropa inti tista' tibbenefika mis-Suq Uniku tal-UE kif ukoll minn ċerti ftehimiet ta' kummerċ ma' pajjiżi Ewropej oħrajn. Dan ifisser li l-biċċa l-kbira tal-merkanzija tista' tiċċaqlaq b'mod liberu f'dan it-territorju mingħajr spejjeż żejda jew restrizzjonijiet kwantitattivi. Dan hu magħruf bħala l- moviment liberu tal-merkanzija. Madankollu, ċerti oġġetti bħall- merkanzija soġġetta għas-sisa u prodotti kimiċi huma soġġetti għal regoli addizzjonali. Għandek ukoll obbligi differenti tal-VAT skont xi tbigħ, lil min u fejn il-merkanzija tiġi ttrasportata.
Twissija
Il-formalitajiet doganali jridu jimtlew meta tiġi importata jew esportata merkanzija bejn pajjiż tal-UE u pajjiż mhux tal-UE (inkluż dawk li jibbenefikaw mill-moviment liberu tal-merkanzija, f'dan il-każ: iż-Żona Ekonomika Ewropea, l-Iżvizzera, it-Turkija, Andorra u San Marino).
Regoli u regolamenti dwar il-prodotti tal-UE
Qabel ma l-merkanzija tidħol fis-suq tal-UE, trid tiżgura li l-prodotti tiegħek jissodisfaw ir-rekwiżiti tal-UE biex tkun protetta s-saħħa tal-bniedem u dik tal-annimali, l-ambjent u d-drittijiet tal-konsumatur. Dawn jistgħu jkunu regoli u speċifikazzjonijiet li huma armonizzati fl-UE jew dawk immaniġġjati minn kull pajjiż tal-UE iżda rikonoxxuti mill-UE; magħrufin bħala r-rikonoxximent reċiproku. Tista' taqra aktar dwar dan fis-suġġett dwar ir- regoli u l-ispeċifikazzjonijiet tal-prodotti.
M'hemmx differenza bejn il-klijenti jkunu fejn ikunu fl-UE.
Filwaqt li int liberu li tiddefinixxi t-termini u l-kundizzjonijiet tal-bejgħ, inklużi l-limitazzjonijiet fuq il-konsenja, il-klijenti kollha bbażati fl-UE jrid ikollhom l-istess aċċess għall-merkanzija bħall-klijenti lokali tiegħek.
Jekk qed toffri prezz speċjali, promozzjoni jew kundizzjonijiet ta' bejgħ favorevoli, dawn iridu jkunu aċċessibbli għall-klijenti kollha tiegħek irrispettivament minn fejn jinsabu fl-UE, in-nazzjonalità, il-post tar-residenza jew il-post tan-negozju tagħhom.
Ir-regoli japplikaw għat-tranżazzjonijiet online u offline sakemm il-bejgħ ikun qed isir lill-utent finali (individwu jew negozju li ma għandux il-ħsieb li jerġa' jbigħ, jittrasforma, jipproċessa, jikri jew jagħti b'sottokuntratt dak li xtara).
Aċċess għal interfaces online
Il-klijenti tiegħek iridu jkunu jistgħu jaċċessaw kwalunkwe verżjoni tas-sit web tiegħek li jixtiequ, pereżempju, jekk jittajpjaw il-URL Spanjol tas-sit web u jkunu kkonnettjati mill-Italja ma għandhomx jittieħdu awtomatikament fil-verżjoni Taljana. Huma għandhom jagħtuk il-kunsens tagħhom qabel ma jsir trasferiment bħal dan u għandhom id-dritt li jirtiraw il-kunsens tagħhom fi kwalunkwe ħin.
Bejgħ tal-prodotti mingħajr konsenja
Jekk toffri servizz ta' ġbir jeħtieġlek tiżgura li l-klijenti bbażati f'pajjiżi tal-UE fejn ma toffrix servizz ta' konsenja għandhom id-dritt li jordnaw prodotti minn fuq is-sit web tiegħek, u jagħmlu arranġamenti għall-konsenja għalihom stess jew li jiġbru l-prodotti huma stess.
Rapportar tal-movimenti tal-merkanziji
Jekk tesporta u/jew timporta fl-UE b'aktar minn ċertu valur, ikollok tipprovdi rapport statistiku dwar il-flussi kummerċjali tiegħek fl-UE.
Il- limiti hawn fuq li għandek tirrapporta jiġu stabbiliti kull sena minn kull pajjiż tal-UE (normalment fl-aħħar kwart) u japplikaw għas-sena kalendarja ta' wara. Jeżistu limiti separati (li jistgħu jvarjaw) għall-esportazzjonijiet (dispaċċi) u l-importazzjonijiet (il-kunsinni li jaslu).
Limiti ta' eżenzjoni
| INTRASTAT: Limitu ta' eżenzjoni (ta' kull pajjiż) | 2021 - Wasla - Euro | 2021 - Wasla - Munita Nazzjonali | 2021 - Dispaċċ - Euro | 2021 - Dispaċċ - Munita Nazzjonali |
|---|---|---|---|---|
| AT | 750 000 | 750 000 | 750 000 | 750 000 |
| BE | 1 500 000 | 1 500 000 | 1 000 000 | 1 000 000 |
| BG | 219 856 | 430 000 | 138 049 | 270 000 |
| CY | 180 000 | 180 000 | 55 000 | 55 000 |
| CZ | 480 000 | 12 000 000 | 480 000 | 12 000 000 |
| DE | 800 000 | 800 000 | 500 000 | 500 000 |
| DK | 967 000 | 7 200 000 | 699 000 | 5 200 000 |
| EE | 230 000 | 230 000 | 130 000 | 130 000 |
| GR | 150 000 | 150 000 | 90 000 | 90 000 |
| ES | 400 000 | 400 000 | 400 000 | 400 000 |
| FI | 600 000 | 600 000 | 600 000 | 600 000 |
| FR | 460 000 | 460 000 | 460 000 | 460 000 |
| HR | 333 333 | 2 500 000 | 173 333 | 1 300 000 |
| HU | 471 600 | 170 000 000 | 277 400 | 100 000 000 |
| IE | 500 000 | 500 000 | 635 000 | 635 000 |
| IT | 800 000 | 800 000 | 400 000 | 400 000 |
| LT | 250 000 | 250 000 | 150 000 | 150 000 |
| LU | 200 000 | 200 000 | 150 000 | 150 000 |
| LV | 230 000 | 230 000 | 120 000 | 120 000 |
| MT | 700 | 700 | 700 | 700 |
| NL | 800 000 | 800 000 | 1 000 000 | 1 000 000 |
| PL | 930 665 | 4 000 000 | 486 333 | 2 000 000 |
| PT | 350 000 | 350 000 | 250 000 | 250 000 |
| RO | 189 970 | 900 000 | 189 970 | 900 000 |
| SE | 860 000 | 9 000 000 | 430 000 | 4 500 000 |
| SI | 140 000 | 140 000 | 220 000 | 220 000 |
| SK | 200 000 | 200 000 | 400 000 | 400 000 |
Fejn jibda l-obbligu tar-rappurtar tiegħek?
Il-pajjiż "tiegħek" tal-UE jistabbilixxi limitu li hu applikabbli għal sena kalendarja partikolari.
- Jekk l-importazzjonijiet/esportazzjonijiet tiegħek tas- sena ta' qabel jaqbżu dak il-limitu mela jkollok tirrapporta minn Jannar ta' dik is-sena partikolari 'l quddiem.
Eżempju: il-pajjiż "tiegħek" tal-UE jistabbilixxi limitu ta' importazzjoni għall-2019 ta' €100 000. Jekk, fl-2018 importajt aktar minn €100 000, jeħtieġlek tirrapporta minn Jannar 2019 'il quddiem.
- Jekk l-importazzjonijiet/esportazzjonijiet tiegħek fis-sena ta' qabel ma qabżux il-limitu, iżda qabżuh matul is-sena kurrenti, mela jkollok tibda tirrapporta mix-xahar li fih ikun inqabeż il-limitu.
Eżempju: Il-pajjiż "tiegħek" tal-UE stabbilixxa limitu ta' importazzjoni għall-2018 ta' €100 000. Minn Jannar sa Ġunju 2018 l-importazzjonijiet akkumulati tiegħek ammontaw għal €90 000. F'Lulju, int timporta merkanzija ta' €15 000 oħrajn. Minħabba li qbiżt il-limitu f'Lulju 2018 trid tirraporta minn dan ix-xahar 'l quddiem. L-ewwel dikjarazzjoni tal-Intrastat imbagħad tirrigwarda l-importazzjonijiet ta' Lulju ta' €15 000.
Hemm imnejn ikollok tirrapporta movimenti tal-merkanzija minn jew lejn pajjiżi tal-UE fejn mhix ibbażata l-kumpanija tiegħek.
Storja bħala eżempju
Rapportar tal-movimenti tal-merkanzija
Matul sena kalendarja, kumpanija tal-ħwejjeġ Awstrijaka ttrasportat €400 000 f'merkanzija mill-Istati Uniti lejn l-Awstrija permezz tal-port ta' Leixões, fil-Portugall.
Il-valur tal-merkanzija mibgħuta mill-Portugall lill-Awstrija kien ogħla mil-limitu tar-rappurtar għad-dispaċċi stabbiliti fil-Portugall (€250 000), għalhekk il-kumpanija Awstrijaka kellha tippreżenta rapport mal-awtoritajiet Portugiżi. Ma kienx hemm bżonn li tirrapporta l-merkanzija li waslet fl-Awstrija għal dik is-sena kalendarja, minħabba li l-livell limitu ta' rappurtar tal-Awstrija għall-wasliet hu ta' €750 000, li hu ogħla mill-valur tal-merkanzija ttrasportata.
Għalhekk, anki jekk il-kumpanija hi stabbilita fl-Awstrija, f'dan il-każ ir-rappurtar sar biss fil-Portugall.
Min għandu jirrapporta?
Negozji u individwi privati rreġistrati għall-finijiet tal-VAT li jibagħtu u/jew jirċievu merkanzija - jekk id-dispaċċi jew il-wasliet jaqbżu l-limiti annwali rispettivi.
Tista' tistaqsi kumpanija speċjalizzata tirrappreżentak u tipprovdi rapport f'ismek
Meta jeħtieġlek tirrapporta?
- Tal-anqas darba kull xahar dwar l-andamenti tal-kummerċ tiegħek għax-xahar ta' qabel.
- L- iskadenza għas-sottomissjoni hi stabbilita mill-awtorità nazzjonali rilevanti f'kull pajjiż tal-UE.
Liema andamenti kummerċjali għandhom jiġu rrapportati?
Il-moviment fiżiku tal-merkanzija mill-istat membru tad-dispaċċ sal-istat membru tal-wasla (u viċi-versa).
Jekk għandek awtorizzazzjoni għall-proċedura tad-dwana ta' pproċessar 'il ġewwa - u l-merkanzija mhux ipproċessata/ipproċessata tiċċaqlaq bejn pajjiżi tal-UE - inti obbligat tirrapporta dawn il-movimenti.
Nota: Jekk int toffri biss servizzi transfruntieri li ma jinkludux iċ-ċaqliq transfruntier ta' merkanzija, m'hemmx il-ħtieġa li tirrapporta taħt is-sistema Intrastat.
Liema data għandek tirrapporta?
Ir-rapporti Intrastat ta' kull xahar tiegħek jeħtiġilhom jinkludu dan li ġej:
- in- numru tal-VAT tiegħek
- il- perjodu (xahar) li qed tirrapporta dwaru
- id-direzzjoni tal-andament kummerċjali: dispaċċ jew wasla
- il- kodiċi bi 8 ċifri tal-prodott tan‑Nomenklatura Magħquda (NM) (In-NM tiġi ppubblikata kull sena fil-Ġurnal Uffiċjali tal-UE)
- il- kodiċi tal-pajjiż tal-UE tad-dispaċċ/tad-destinazzjoni
- il- valur tal-merkanzija – esklużi l-VAT u d-dazji tas-sisa
(Jekk il-valur għandu x'jaqsam ma' attivitajiet ta' pproċessar, ikollok tikseb il-valur tal-merkanzija pproċessata, u mbagħad taħdem il-valur tal-merkanzija mhux ipproċessata u tgħoddu mal-valur miżjud waqt l-ipproċessar, eż. għall-materjali u l-pagi).
Eżempju: Għandek kuntratt biex tiksi pajpijiet tal-metall li se jintbagħtulek minn Stat Membru ieħor. Il-valur li tirrapporta għall- importazzjonijiet tiegħek ikun tal-valur tal-pajpjiet mhux ipproċessati; għall- esportazzjonijiet tiegħek ikollok tirrapporta l-valur tal-pajpijiet miksija, ipproċessati (li jkun jikkonsisti fil-valur tal-pajpijiet mhux ipproċessati flimkien ma' kwalunkwe spejjeż oħra: ħlasijiet ta' servizzi u materjali).
- il- kwantità tal-prodotti f' massa netta (bi tnaqqis tat-toqol tal-ippakkjar)
- l- unità ta' kejl skont in-NM (pereżempju litru, għadd ta' oġġetti, metri kwadri)
- il- kodiċi għan-natura ta' tranżazzjoni (li jidentifika l-attività ta' xiri, bejgħ jew ipproċessar).
Jista' jkollok tipprovdi informazzjoni addizzjonali bħat-termini tal-konsenja kif speċifikat fil-ftehim kuntrattwali (eż. EXW, CIF, FOB) jew it-tip ta' trasport (eż. baħar/triq/ferrovija).
L-awtoritajiet nazzjonali joffru għodod li jgħinu lin-negozji jilħqu l-obbligi tagħhom ta' rappurtar tal-Intrastat. Ara kif pajjiżi differenti japplikaw is-sistema tal-Intrastat fuq is-siti web ta' hawn taħt.