Żwieġ

Iż-żwieġ ċivili hu status legali li jeżisti fil-pajjiżi kollha tal-UE. Madankollu, ir-regoli li japplikaw għal sħubijiet bħall-unjonijiet ċivili u s-sħubijiet reġistrati, jew għall-unjonijiet de facto , huma differenti mir-regoli li japplikaw għaż-żwieġ.

Ir-regoli nazzjonali dwar iż-żwieġ ivarjaw minn pajjiż tal-UE għal ieħor, b’mod prinċipali f’dak li jirrigwarda:

• id-drittijiet u l-obbligi tal-koppji miżżewġin: pereżempju, rigward il-proprjetà tagħhom, jew kunjomhom ladarba jiżżewġu
• ir-rabta bejn iż-żwieġ reliġjuż u dak ċivili: xi pajjiżi tal-UE jittrattaw iż-żwieġ reliġjuż bħala ekwivalenti għaż-żwieġ ċivili, oħrajn le. Jekk tmur tgħix f’pajjiż ieħor tal-UE wara li tkun iżżewwiġt b’mod reliġjuż biss, iċċekkja l-konsegwenzi għall-istat ċivili tiegħek fil-pajjiż tal-UE li mort tgħix fih.
• il-possibbiltà għal koppji tal-istess sess li jiżżewġu. Dawn li ġejjin huma l-pajjiżi tal-UE li jagħtu dan id-dritt: l-Awstrija, il-Belġju, id-Danimarka, l-Estonja, il-Finlandja, Franza, il-Ġermanja, il-Greċja, l-Irlanda, il-Lussemburgu, Malta, in-Netherlands, il-Portugall, is-Slovenja, Spanja u l-Iżvezja. Iż-żwieġ bejn persuni tal-istess sess hu possibbli wkoll fl-Iżlanda, fin-Norveġja u fl-Iżvizzera.

Sir af iktar rigward ir-regoli nazzjonali dwar iż-żwieġ u r-reġimi tal-proprjetà matrimonjali.

Żwiġijiet transfruntieri fl-UE

Dawn jirreferu għal żwiġijiet li jinvolvu pajjiżi differenti tal-UE — pereżempju, minħabba li tiżżewweġ xi ħadd ta’ nazzjonalità differenti, jew għax tiżżewweġ f’pajjiż tal-UE li mhux il-pajjiż tal-oriġini tal-UE tiegħek.

X’għandek tagħmel qabel it-tieġ

Iċċekkja liema liġijiet ta’ liema pajjiż japplikaw għaż-żwieġ tiegħek u għar-reġim tal-proprjetà matrimonjali tiegħek. Dan ikollu konsegwenzi importanti għad-drittijietek u għall-obbligi tiegħek bħala wieħed jew waħda mill-konjuġi.

Jekk se tiżżewweġ f’pajjiż differenti tal-UE minn dak li qed tgħix fih, iċċekkja mal-awtoritajiet fiż-żewġ pajjiżi tal-UE liema formalitajiet huma meħtieġa biex iż-żwieġ tiegħek ikun fis-seħħ u effettiv għalkollox fiż-żewġ pajjiżi. Dawn jistgħu jinkludu r-rekwiżiti tar-reġistrazzjoni jew tal-pubblikazzjoni.

X’għandek tagħmel wara t-tieġ

Fil-prinċipju, iż-żwieġ tiegħek konkluż f’pajjiż tal-UE jiġi rikonoxxut fil-pajjiżi l-oħra kollha tal-UE — għalkemm dan ma japplikax bis-sħiħ għaż-żwiġijiet bejn persuni tal-istess sess.

Ir-rikonoxximent taż-żwieġ tiegħek f’pajjiż ieħor tal-UE — id-drittijiet mogħtija mil-liġi tal-UE u mil-liġi nazzjonali

Jekk iżżewwiġt f’pajjiż tal-UE u teħtieġ li ż-żwieġ tiegħek jiġi rikonoxxut f’pajjiżek jew f’pajjiż ieħor tal-UE, għandek tkun taf li hemm differenza bejn:

1. id-drittijiet mogħtija mil-liġi tal-UE, bħad-dritt tiegħek għal-libertà tal-moviment, li jinkludi d-dritt tiegħek li tiċċaqlaq u li tgħix mal-konjuġi tiegħek f’pajjiż ieħor tal-UE, u
2. id-drittijiet mogħtija mil-liġi nazzjonali tal-pajjiż tal-UE fejn qed tfittex rikonoxximent, bħad-drittijiet tal-wirt u tal-manteniment għalik u għall-konjuġi tiegħek, jew id-dritt għall-benefiċċji tal-familja.

Jekk tiżżewweġ f’pajjiż tal-UE, il-pajjiżi l-oħra kollha tal-UE huma meħtieġa mil-liġi tal-UE li jirrikonoxxu ż-żwieġ tiegħek għad-drittijiet mogħtija mil-liġi tal-UE, b’mod partikolari d-dritt tiegħek għal-libertà tal-moviment, li jinkludi d-dritt tiegħek li tiċċaqlaq u li tgħix mal-konjuġi tiegħek f’pajjiż ieħor tal-UE. L-obbligu tal-pajjiżi tal-UE li jirrikonoxxu ż-żwieġ tiegħek għad-drittijiet mogħtija mil-liġi tal-UE japplika kemm jekk iż-żwieġ tiegħek ikun żwieġ eterosesswali kif ukoll jekk ikun żwieġ bejn persuni tal-istess sess.

Jekk teżerċita d-dritt tiegħek għal-libertà tal-moviment u tmur tgħix u taħdem f’pajjiż ieħor tal-UE, il-konjuġi tiegħek jista’/tista’ jiċċaqlaq/tiċċaqlaq u jgħix/tgħix miegħek hemmhekk. Iċċekkja r-regoli dwar ir-residenza:

• għall-konjuġi u għat-tfal tiegħek mill-UE
• għall-konjuġi u għat-tfal tiegħek mhux mill-UE

Madankollu, jekk tiżżewweġ f’pajjiż tal-UE u tixtieq li ż-żwieġ tiegħek jiġi rikonoxxut f’pajjiżek jew f’pajjiż ieħor tal-UE sabiex tkun tista’ tibbenefika mid-drittijiet mogħtija mil-liġi nazzjonali, hi l-liġi nazzjonali tal-pajjiż tal-UE fejn qed tfittex rikonoxximent li tapplika għar-rikonoxximent taż-żwieġ tiegħek. Dan ifisser li l-pajjiżi tal-UE bħalissa huma liberi li jiddeċiedu jekk jirrikonoxxux iż-żwieġ tiegħek għad-drittijiet mogħtija mil-liġi nazzjonali tal-pajjiż tal-UE fejn qed tfittex rikonoxximent. Dawn id-drittijiet jinkludu d-dritt li tiret mingħand il-konjuġi tiegħek jew id-dritt li tikseb manteniment mingħand il-konjuġi tiegħek (pereżempju, jekk tiddivorzjaw), jew id-dritt tiegħek li tibbenefika minn benefiċċji tal-familja.

Ġeneralment, il-pajjiżi kollha tal-UE jirrikonoxxu żwieġ eterosesswali konkluż f’pajjiż ieħor tal-UE għad-drittijiet mogħtija mil-liġi nazzjonali, iżda dan mhux dejjem ikun il-każ għal żwieġ bejn persuni tal-istess sess. Bħalissa, huma biss il-pajjiżi tal-UE li jippermettu ż-żwieġ bejn persuni tal-istess sess fit-territorju tagħhom li fil-prinċipju se jirrikonoxxu żwieġ bejn persuni tal-istess sess konkluż f’pajjiż ieħor tal-UE għad-drittijiet mogħtija mil-liġi nazzjonali. Dawn il-pajjiżi tal-UE huma: l-Awstrija, il-Belġju, id-Danimarka, l-Estonja, il-Finlandja, Franza, il-Ġermanja, il-Greċja, l-Irlanda, il-Lussemburgu, Malta, in-Netherlands, il-Portugall, is-Slovenja, Spanja u l-Iżvezja. Ir-rikonoxximent ta’ żwiġijiet bejn persuni tal-istess sess hu possibbli wkoll fl-Iżlanda, fin-Norveġja u fl-Iżvizzera

Rikonoxximent u reġistrazzjoni taż-żwieġ

Normalment, l-awtoritajiet fil-pajjiż tal-UE fejn tiżżewweġ jirreġistraw iż-żwieġ tiegħek fir-reġistru ċivili jew tal-popolazzjoni hemmhekk.

Jekk tiżżewweġ f’pajjiż tal-UE li mhux il-pajjiż tal-oriġini tal-UE tiegħek, jaf tkun trid li ż-żwieġ tiegħek jiġi rikonoxxut u reġistrat f’pajjiżek ukoll. Ir-rikonoxximent taż-żwieġ tiegħek f’pajjiżek normalment jinvolvi r-reġistrazzjoni taż-żwieġ tiegħek fir-reġistru ċivili jew tal-popolazzjoni ta’ pajjiżek fl-UE.

Ir-reġistrazzjoni ssir mill-awtoritajiet tal-pajjiż tal-oriġini tal-UE tiegħek f’konformità mar-regoli nazzjonali tal-pajjiż tal-oriġini tal-UE tiegħek. Tista’ tiċċekkja wkoll mal-uffiċċju konsulari ta’ pajjiżek jekk tistax tirreġistra ż-żwieġ tiegħek fl-uffiċċju konsulari jew jekk tridx tagħmel dan fil-pajjiż tal-oriġini tal-UE tiegħek.

Jekk ma tiżżewwiġx fil-pajjiż tal-oriġini tal-UE tiegħek, normalment ma jkunx obbligatorju li ż-żwieġ tiegħek jiġi rikonoxxut u reġistrat f’pajjiżek ukoll. Madankollu, f’xi każijiet, ir-rikonoxximent u r-reġistrazzjoni taż-żwieġ tiegħek fil-pajjiż tal-oriġini tal-UE tiegħek se jkunu meħtieġa wkoll jekk tixtieq tibbenefika mid-drittijiet mogħtija mil-liġi nazzjonali (pereżempju, għall-finijiet ta’ wirt jew ta’ benefiċċji tal-familja) f’pajjiżek jew f’pajjiż ieħor tal-UE.