Kreditu u self tal-konsumatur

Meta tieħu kreditu tal-konsumatur, ftakar li hemm regoli tal-UE biex jipproteġuk qabel ma tiffirma l-kuntratt u biex jiggarantixxu li tkun tista' tirranġa, jekk ikun hemm bżonn.

Informazzjoni importanti biex tkun tista' tqabbel l-offerti.

Jekk tiddeċiedi li tixtri prodott ġdid fuq kreditu, ikun aħjar li tqabbel l-offerti qabel ma tieħu deċiżjoni. Qabel ma tiffirma xi kuntratt ta' kreditu, il-fornitur tal-kreditu jrid jagħtik dokument standard magħruf bħala l- formola ta' Informazzjoni Standard Ewropea dwar il-Kreditu lill-Konsumatur en . Din qiegħda apposta biex tagħtik l-aħjar ħarsa ġenerali possibbli lejn it-termini u l-kundizzjonijiet ta' kull kuntratt ta' kreditu li tkun qed tikkunsidra. Tinkludi:

• il-karatteristiċi ewlenin tal-kuntratt
• l-ammont ta' kreditu u l-ispiża tiegħu
• ir-Rata Perċentwali Annwali (RPA - ċifra waħda li tirrappreżenta l-ispiża totali tal-kreditu, inklużi mgħax, kummissjoni, taxxi u kull tip ta' tariffi)
• in-numru, il-frekwenza u d-daqs tal-pagamenti kollha tiegħek
• nota dwar aspetti legali importanti

Dan jippermettilek tqabbel offerti minn fornituri ta' kreditu differenti u tagħżel dak li jgħodd l-aħjar għalik. Jekk ma rċevejtx din il-forma mill-fornitur ta' kreditu tiegħek, tista' titlob waħda.

Irtirar minn kuntratt ta' kreditu

Jekk jerġa' jibdielek dwar il-ftehim ta' kreditu li ffirmajt jew tirrealizza li m'għandekx bżonn kreditu wara kollox, tista' tirtira mill-ftehim fi żmien 14-il jum kalendarji minn meta ffirmajt. M'hemmx bżonn tagħti spjegazzjoni lill-fornitur ta' kreditu, iżda jkollok tagħti l-flus li ssellift lura, flimkien mal-imgħax u kwalunkwe spejjeż mhux rimborsabbli diġà mħallsa mill-fornitur tal-kreditu.

Biex tħallas id-dejn qabel iż-żmien

Jekk tixtieq taqta' d-dejn aktar kmieni minn dak li hemm fil-kuntratt, għandek dritt tagħmel dan. Kun af li għandu mnejn ikollok tagħti kumpens lill-fornitur tal-kreditu għad-dħul li se jitlef. Dan il-ħlas kumpensatorju, madankollu, m'għandux jeċċedi l-ammont totali ta' mgħax effettivament mitluf.

Dawn ir-regoli japplikaw għal kreditu tal-konsumatur ta' bejn €200 u €75,000, bl-eċċezzjoni ta' self:

• żgurat b' ipoteka
• konkluża għax-xiri ta' art jew ta' proprjetà immobbli
• għal kiri jew ftehim ta' kiri fejn m'hemm l-ebda obbligu ta' xiri
• mogħtija mingħajr imgħax u mingħajr tariffi oħra, jew fil-forma ta' faċilità ta' self korrenti li jrid jitħallas lura fi żmien xahar
• li tirriżulta minn deċiżjoni ġudizzjarja
• marbuta ma' self mogħti lil grupp ristrett minn fost il-pubbliku ġenerali

Biex tieħu kreditu jew self f'pajjiż ieħor tal-UE

Jekk tixtieq tieħu kreditu jew self f'pajjiż ieħor tal-UE, kun af li l-banek jistgħu ma jkunux iridu jisilfu flus lil residenti ta' pajjiżi oħrajn barra minn fejn ikun ibbażat il-bank jew saħansitra li jisilfu lil residenti tal-istess pajjiż li jaħdmu f'pajjiż ieħor tal-UE.

Il-banek huma liberi li jistipolaw dan it-tip ta' limitu fuq is-self. Iżda jekk taħseb li l-bank għamel diskriminazzjoni kontrik, tista':

• tikkuntattja lill-bank (uffiċċju għall-ilmenti) biex tikseb risposta bil-miktub li tagħti r-raġunijiet preċiżi għaċ-ċaħda ta' kreditu;
• skont ir-risposta miktuba mill-bank, itlob parir u formola tal-għajnuna mingħand FIN-NET (in-Netwerk għar-Riżoluzzjoni ta' Tilwim Finanzjarju), li toffri medjazzjoni f'kunflitti finanzjarji bejn konsumaturi u fornituri ta' servizzi finanzjari, bħall-banek