Dífhostaíocht thar lear

Ag smaoineamh ar fhanacht.

Má chailleann tú do phost agus má roghnaíonn tú fanacht sa tír den Aontas ina raibh tú fostaithe, ba chóir duit sochair dhífhostaíochta a éileamh ansin.

Cláraigh mar chuardaitheoir poist leis na seirbhísí fostaíochta áitiúla. Caithfear leat mar a chaitear le náisiúnaigh na tíre sin.

Bí airdeallach ar an méid seo a leanas:

• tréimhsí oibre a theastaíonn chun cáiliú do shochar dífhostaíochta
• na rátaí is infheidhme chun an sochar a ríomh
• fad an tsochair

Más gá duit aon tréimhsí fostaíochta agus clúdach slándála sóisialta thar lear roimhe seo a dheimhniú, d’fhéadfadh sé go mbeidh ort iarratas a dhéanamh ar fhoirm U1 (foirm E 301 roimhe seo) sa tír inar oibrigh tú roimhe seo.

Fiú mura gcuireann tú foirm U1 isteach, is féidir leis na daoine a bheidh ag plé leis an éileamh eolas a fháil go díreach ó údaráis na tíre eile. Mar sin féin, d’fhéadfadh an fhoirm cabhrú le dlús a chur leis an bpróiseáil.

Ag filleadh abhaile?

Má tharlaíonn sé, tar éis duit do phost a chailleadh, go roghnaíonn tú filleadh ar do thír dhúchais, ní mór duit teagmháil a dhéanamh leis an tseirbhís náisiúnta fostaíochta ansin le fáil amach an bhfuil tú fós i dteideal sochar dífhostaíochta tar éis duit a bheith thar lear.

I gcás ina bhfuil, beidh ort an méid seo a leanas a dhéanamh:

• clárú go díreach mar chuardaitheoir poist i do thír dhúchais, agus
• iarratas a dhéanamh ar fhoirm U1 (foirm E 301 roimhe seo) sa tír dheireanach inar oibrigh tú.

Fiú mura gcuireann tú foirm U1 isteach, is féidir leis na daoine a bheidh ag plé leis an éileamh eolas a fháil go díreach ó údaráis na tíre eile. Mar sin féin, d’fhéadfadh an fhoirm cabhrú le dlús a chur leis an bpróiseáil.

Mura bhfuil tú i dteideal sochar i do thír thionscnaimh, is féidir leat iarratas a dhéanamh ar údarú chun do shochar dífhostaíochta a aistriú ón tír inar chaill tú do phost:

• ar ais go dtí do thír bhaile, sin nó
• go tír ar bith eile mar ar mian leat post a lorg

Is iondúil go n-aistrítear sochair ar feadh 3 mhí, ach féadfar síneadh a chur leis sin go tréimhse 6 mhí ar a mhéad.

Má roghnaíonn tú fanacht faoi chumhdach sa tír ónar postaíodh thú, ba cheart go n-íocfaí do shochar dífhostaíochta leat ansin.

Sa chás sin, ba chóir duit clárú mar chuardaitheoir poist leis na seirbhísí fostaíochta sa tír sin.

Má tá tú dífhostaithe go hiomlán, is féidir leat a roghnú sochair dhífhostaíochta a fháil sa tír den Aontas inar postaíodh thú nó i do thír dhúchais - trí chlárú leis na seirbhísí fostaíochta.

• Má chinneann tú iarratas a dhéanamh ar shochair sa tír inar postaíodh thú, iarr foirm U1 (foirm E 301 roimhe seo) ar an tseirbhís náisiúnta fostaíochta i do thír dhúchais.

  Taispeántar ar an bhfoirm sin na tréimhsí atá le cur san áireamh agus sochair dhífhostaíochta á ríomh. Seol chuig an tseirbhís náisiúnta fostaíochta é sa tír ina bhfuil iarratas á dhéanamh agat ar shochair.

  Fiú mura gcuireann tú foirm U1 isteach, is féidir leis na daoine a bheidh ag plé leis an éileamh eolas a fháil go díreach ó údaráis na tíre eile. Mar sin féin, d’fhéadfadh an fhoirm cabhrú le dlús a chur leis an bpróiseáil.

• Má shocraíonn tú iarratas a dhéanamh ar shochair i do thír dhúchais, beidh ort dul ar ais ansin.

Déanfar do shochair a ríomh i gcomhréir le rialacha na tíre ina gcláraíonn tú mar chuardaitheoir poist, agus aon tréimhsí a d'oibrigh tú thar lear á gcur san áireamh.

Más comaitéir trasteorann (fostaithe nó féinfhostaithe) thú agus má chailleann tú do phost, ní féidir leat sochair dhífhostaíochta a éileamh ach amháin sa tír ina bhfuil cónaí ort.

Méid

I gcás ina bhfuil tú i dteideal sochar dífhostaíochta nó nach bhfuil, agus an méid, braithfidh sé sin ar na rialacha sa tír ina bhfuil cónaí ort agus ar an am a d'oibrigh tú thar lear.

Iarr foirm U1 (foirm E 301 roimhe seo - ag taispeáint tréimhsí atá le cur san áireamh agus sochair dhífhostaíochta á ríomh) ar na húdaráis sa tír (nó sna tíortha) inar oibrigh tú.

Seol an fhoirm sin chuig na seirbhísí náisiúnta fostaíochta sa tír inar mian leat iarratas a dhéanamh ar shochair, chun go mbeidh siad in ann aon tréimhsí cumhdaigh slándála sóisialta nó fostaíochta i dtíortha eile a chur san áireamh.

Fiú mura líonann tú isteach foirm U1, is féidir leis na daoine a bheidh ag plé leis an éileamh eolas a fháil go díreach ó údaráis na dtíortha eile. Mar sin féin, d’fhéadfadh an fhoirm cabhrú le dlús a chur leis an bpróiseáil.

An bhfuil cabhair uait chun obair a fháil?

Má theastaíonn cabhair uait chun post nua a fháil sa tír inar chaill tú do phost, is féidir leat clárú mar chuardaitheoir poist leis an tseirbhís náisiúnta fostaíochta ansin. Beidh ort ansin na ceanglais sa dá thír a chomhlíonadh: an tír chónaithe (an tír atá ag íoc do shochair) agus an tír dheireanach inar oibrigh tú (an tír ina bhfuil post á lorg agat freisin).