安達臣道塌天秤｜事隔年半仍未釋懷 死者家屬冀公開真相：簡直就係謀殺

2022年安達臣道房協地盤塌天秤3死6傷慘劇，警方今日（30日）拘捕一名地盤總承建商「精進建築有限公司」的35歲時任項目經理，他被控3項誤殺罪，周四（5月2日）上午於觀塘裁判法院提堂，同時通緝一名72歲外判註冊結構工程師。慘劇雖然事隔一年半，但25歲死者徐學培的父親向《星島頭條》表示，家人想起學培時仍會感到傷感，心情不好受，「捱咗6年佢終於做到工程師喇，但居然發生意外，真係好傷感，平日我哋盡量都唔提起（學培），避免觸景傷情」。至於最年輕死者、任工程師助理的22歲潘浩鈺，其母親至今仍未釋懷，受訪期間不禁啜泣，「呢啲簡直就係謀殺，我個仔得22歲㗎咋，讀咗三年IVE出嚟，喺間公司實習咗幾個月，派到去呢個地盤得做咗4個月」。

相關新聞：安達臣道塌天秤｜前年事發釀3死6傷 精進建築時任項目經理涉誤殺今被捕

徐爸爸向記者表示，警方今日拘捕地盤總承建商的35歲時任項目經理，雖然「遲咗少少」，但明白警方搜證需時，不是一時三刻可以做到，「愈早就愈好啦，不過都明白成單嘢唔係一兩個人嘅責任，又燒焊又檢查，咁多個步驟程序，所以都會理解同明白」。

工程師徐學培被困七小時後被尋回，可惜當場死亡。資料圖片

死者徐學培。

徐爸爸表示，希望所有人可以本住良心做事，唔好慳得就慳，要以安全為首。資料圖片

本身任職工程界的徐爸爸透露，事發當日曾到現場了解，認為現場有多處地方不合理，「我年紀大可能眼花睇咗嘢，但點解可以咁加工，加少少都可能會影響個結構，同埋乜嘢叫目測，而家呢個年代有晒儀器可以做測試，支天秤咁樣冧落嚟，真係唔可以講話係意外囉，如果嗰陣係放飯時間，可能唔止3死6傷，可能仲有更多人命傷亡，更加多家庭受影響」。

相關報道：安達臣道塌天秤｜警方通緝72歲外判註冊結構工程師

對於近期工業意外頻生，他希望所有承建商及工程公司可以做足安全措施，細心檢查所有工序，避免再發生工業意外，「真係希望所有人可以本住良心做事，唔好慳得就慳，要以安全為首，同時亦都有望政府可以加強罰則，唔好淨係單純罰款，應該要有實際罰則，例如坐監咁，等大家知道出事之後係會上身，唔可以話係意外就算數」。

他坦言意外發生後，一家人的心情並不好受，「完全話無嘢又唔係，捱咗6年佢（學培）終於做到工程師喇，但居然發生意外，真係好傷感……平日我哋盡量都唔提起（學培），避免觸景傷情」。

死者潘浩鈺母親泣訴：直頭係謀殺嚟

意外中另一死者潘浩鈺年僅22歲，當時任職工程師助理。潘媽媽今日亦接受《星島頭條》電話訪問，表示：「我接受唔到得兩個人，呢件事唔係邊一個人，或者某一個環節出錯疏忽，佢從第一時間點樣去設計，點樣去安裝呢個天秤已經做錯……一路落嚟每一個環節，每一個部門都無人管，無人去理，無人去check，無人去驗收，簽曬啲假文書。」

工程師助理潘浩鈺送院後傷重不治。資料圖片

潘媽媽又直言「呢啲簡直就係謀殺，初初出事我都講過，呢個係謀殺！我非常贊同徐爸爸睇法，一個全新天秤，由設計、力學、承重量，然後到安裝、檢測、第三方……佢有好多個環節，如果有一兩人出嚟懷疑，覺得佢唔妥，甚至認真做過檢測，唔會有呢事情發生」，直斥精進罔顧安全。

事隔一年半，潘媽媽仍未釋懷，受訪期間不禁啜泣，「我個仔得22歲㗎咋，讀咗三年IVE出嚟，喺間公司實習咗幾個月，派到去呢個地盤得做咗4個月」，重申「直頭係謀殺嚟，唔係打颱風，唔係吊得重過頭，而係成個基座拗斷」，坦言目前希望警方及政府能徹查，查出事實真相，「給全香港市民一個嚴肅嘅真相」。

安達臣道地盤冧天秤意外於去年9月發生。資料圖片

安達臣道地盤冧天秤意外於去年9月發生。資料圖片

冧天秤意外導致3死6傷。資料圖片

勞工處已完成調查，向相關者提出67項檢控。資料圖片

---

 

《星島申訴王》推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF

緊貼最新最快新聞資訊，請立即下載星島頭條App：https://bit.ly/3Q29Vow