世界盃2022｜專家分析:阿根廷之矛 難破格仔盾
2022-12-13 08:30 
阿根廷上場擊敗荷蘭出現唔少踢到飛沙劈石嘅鏡頭，當中柏利迪斯將個波勁射荷蘭後備席，相信係全場最令人火都嚟埋嘅一幕。不計完場之後，球證合共畀咗十四張黃牌，阿根廷佔其中八張，你就知場面有幾激烈。
阿根廷已經唔係第一次踢到咁狠辣，上屆美洲國家盃決賽對巴西，阿根廷連環用啲幾肉酸嘅攔截中止巴西嘅進攻。當然呢種踢法唔好聽嘅叫「茅」，但有時為咗勝利，幾唔好睇嘅招數都要出，艾爾相信嚟緊四強都會有唔少呢類嘅攔截。
克羅地亞今屆有幾韌，大家都有眼睇，上場逼到巴西踢到互射十二碼分勝負，即使球員質素唔夠對手，但人釘人做得好，兩閘將森巴軍團翼鋒進攻防守得無影無蹤，加上門將利華高域神龍上身，巴西好難先攻得入。今屆世界盃「格仔兵」只失三球，防守固若金湯。
阿根廷同克羅地亞上場都要打足百二分鐘，體能回復上可能前者些微佔優，畢竟平均年齡較輕。不過克羅地亞又一次做加時之鬼，應對壓力經驗豐富，名副其實「食鹽多過你食米」，加上士氣高漲，艾爾覺得阿根廷又要面臨一場硬仗。
阿根廷上場都睇到另一個問題，係死球防守一般。尤其第一球畀對面嘅韋格賀斯頂入，正係「地面屠夫」利辛度馬天尼斯唔夠爭頂。始終阿根廷球員身高唔係突出，今仗對住身形健碩嘅克羅地亞球員，前者高空波競爭力稍遜。如果克羅地亞教練達歷能夠針對呢個弱點部署，阿根廷會非常頭痕。
阿根廷雖然有球王美斯在陣，部分中前場球員表現都搶鏡，但艾爾覺得克羅地亞可以憑整體性克服不足，未必喺法定時間有勝負，乾脆要讓球「+0.5/+1」下盤算啦。 艾爾
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應