Taoisme
Taoisme (Tionghoa: 道教 sanga 道家 ) juo igorar dohot Daoisme, iprakarsai ni Laozi (老子;pinyin:Lǎozǐ) sian ujung Jaman Chunqiu na mangolu i 604-517 sM sanga abad pa-6 dompakso Masehi. Taoisme ima ajaran Laozi na mardasorkon Daode Jing (道德經,pinyin:Dàodé Jīng). Parjolona Daode jing idokon Laozi Wuqianyan (老子五千言) sanga Tulisan Laozi Lima Ribu Hata. Sidungi Ia maninggalkon inang kota dot inda unjung binegebe baritana. Ipudiniari, samaso Dinasti Han (202 – 221 SM) kitop i muloi idokon Daodejing, arani mangkobari satontang Dao ( Dalan ) dot De (德, sanga Poda) na iajarkon Laozi[1].
Kitop pondok na marjudul Daodejing i, tu nasatorusna manjadi kitop tiopon utamo tu par panganut Daoisme.Pangiut Laozi na tarbonggal ima Zhuangzi (莊子) na manjadi tokoh panulis kitop na marjudul Zhuangzi. Salain i adong Lie Zi 列子, Huainan zi 淮南子 juo tarmasuk filsuf Taoisme. Lie Zi, Huainan Zi juo mambaen kitop na marjudul Lie Zi dot Huainan Zi.
Taoisme ima sada aliran filsafat na marasal tingon Cino. Taoisme madung marumur ribuan taon, dot urat-uratni pamikiranna madung adong dompakso maso Konfusiusme. Hal on bisa idokon manjadi pamangkal ni Taoisme. Bontuk Taoisme na lobi sistematis dot manjadi aliran filsafat ro ira-ira 3 abad SM. Salain aliran filsafat, Taoisme juo ro i bagasan bontuk agama rakyat, na muloi markembang 2 abad sidung parkembangan filsafat Taoisme.