張頴康收老婆「造人」暗示欲追第四胎？苦呻陷經濟危機要考小巴牌

更新時間：15:30 2023-06-03
發佈時間：15:30 2023-06-03

41歲張頴康與麥雅緻（Angie）於2012年結婚，先後誕下9歲大女「小豆」張雅喬、5歲二子「小花生」張迅橋和1歲多孻仔「小蛋黃」Maka，一家五口生活幸福美滿。出名是「廿四孝爸爸」的張頴康平日即使工作再忙，仍會抽空陪太太和三個寶貝仔女，雖然正趕拍TVB新劇《逆天奇案2》，但他近日都趁放假現身小花生的學校運動會，然而當日活動在36度高溫下進行，麥雅緻就大爆老公熱到忍不住在她耳邊細聲爆粗：「呢個活動係玩_啲家長㗎，吓話？」認真爆笑，不過麥雅緻指，為人父母何止要面對酷熱天氣，仲要同時教育及照顧子女心情，令他們明白志在參與、從中建立自信、如何反敗為勝。

【點擊睇張頴康吐苦水】：

為人父母甚艱難，幸有太太麥雅緻全職照顧三名子女，令張頴康可在外專心搏殺搵奶粉錢，惟今日（3日）凌晨他忽然於社交網「大吐苦水」，並貼出小豆和小花生各自抱B的燦笑相，張頴康寫道：「我老婆趁我唔喺香港嘅時候send咗呢啲相畀我！當我睇到嗰陣，真係嚇一跳！我心諗：1.唔通佢又想要小朋友　2.唔通佢想叫小豆小花生畀啲暗示我？」正當他懷疑太太暗示想追第四胎，令他大感恐慌之際，麥雅緻卻表示兩個仔女只是貪得意攬住隻公仔玩，即時鬆一口氣的張頴康續嘆道：「老實講，如果屋企再多兩個小朋友！我要考小巴牌先搞得掂呀！」不過一班網民就熱烈鼓吹他生多個：「可能佢兩個仲想要多兩個弟弟同妹妹呀」、「你都係去考定先啦！呢啲嘢話唔埋架！」、「揸拉頭好啲，車箱內間夠放BB牀」。