For Muko Magazine

Vannunsiam Bawm
General Secretary
The Young Bawm Association (YBA).
November 12, 2020

Amasa hen chibai ka nan bûk na. Duhsaknâk ka tâwng le, “Muko magazine” lakah article hawng
rîn kho ding hun remchang nan hawng ka pêk ruangah thungai hen ka lâwm hen lâwmthu ka nan
tlunh na. Hinah, deihnâk 10 siam a si hâwihen hun tâwmte karah ka timhtuah mi a si ruangah
duh hâwihen a tlinglonâk tampi a um lai. Bawm hawlh a si le, rêl zawng lo mi rangah chun tâwm
tite harsa kan theih lai. Duhsah hen hawng rêl thiam ka nan sâwm na. Mailei ah Pathian nih hun
remchang hawng kan pêk nawlh chun, ṭha dauh tlainâk leh pêknâk nei hen rîn vima kan a tum
lai.

1. Muko magazine: Bawm ca hi zeitik ah, aho nih dah a rak in serpiak hna?

Keimah: Kum 1918 December ni 12 ah Pu Edwin Rolands (Pu Zo Sâpthar) chu, Pastor
Patlaia leh Pu Khuaichik hawng put na hen Chittagong Hill Tracts ah Lalpa Thawngthang
Ṭha sim dinghen khual a hawng tlawngpi na le, Bawm khua “Vairêlhte” ti mi khua ah an
hawng tleng (Rev. Thimkhup, Thesis Phek 26). Edwin Rowlands leh a hâwi tla chu
Vairêlh leh a kiangkam mi khua: Tlângpi, Pankhiang leh Fiangpidung khua-tla ah
ruklêmtla mang hen Pathian thu an sim. A neh nun kum 1922 ah Pu Patlaia, Pu Lian
Thawnga leh Pu Saikunga chu North East International General (NEIG) Mission nih
Chittagong Hill Tracts ah a hawng fial nawlh na. Annih tla nih chun, Pathian thu cho an
hawng sîntir na lo le, rîn leh rêl kho dinghen Lushei leihen hawrawptla kan Bawm mipi
tla rangah sîntirnâk an pêk vima rawh a si. Lushei hawrawp hen sîntirnâk an pêk vima mi
khawm chu, Roman script thawkhen laksuak mi nget a si le, kum 1894 ah Zosap
missionary panih Pu Buanga (Rev. J. H. Lorrain) leh Sap Upa (Rev. F. W. Savidge) nih
an siammi hawrawp chiah chu tawm khawm dangtir lo hen kan nih Bawm khawm nih
kan mang chawlh a si (Bawm Vannunsiam, Bawm Basic Grammar, Phek 1).

Bawmfa lakah Rev. Kualthang chu 1929 ah cha sîn a dawmh masachem. Hi kan pu cha
sîn leh hawrawp kan mang dawmh kum hi 1929-1930 ah tleih kho a si.

Chu mi hun tla hawng kal vima nûnah chun, Pu L. Dolian nih, “Bawm Bu-Bulbu (The
Bawms Primar Book)” tihen Churachandpur NEIG Mission ah kum 1951 pâwl VII leh
pâwl VIII a sînliâu a timhtuah mi chu 4.4.1953 ah The Bawm Student’s Association
(BSA) nih Pangkhiang khua ah awngnâk leh lawmhnâk nei a si (Chêunâk Vol. 5, 1952).
2. Muko magazine: Nan ca hi cozah sianginn ah nan cawng kho maw, zeitindah nan
fale nan chimh hna?

Keimah: Bangladesh ram sawrkar thuneihnâk tangah um mi kan si le, kan ram sawrkar
nih sînnâk curriculum siam mi dan hen Bangla cha hi a pangai hen kan a sîn tâwn. Sînnâk
In (Sikul In) ah kan Bawm cha chu kan a sîn kho lem lo le, sikhawmsele; kan ram sungah
Kawhmi (Church) kip nih ngâksia Sunday Sikul an nei mi tla lakah kan cha hawrawp leh
Baibul sîntirnâk ngâksia rangah nei a si. Chu mi sîntirnâk ruangah kan cha chu kan rêl
kho ver a si. Sikhawmsele, kan te-le-fa tla thlanglei ah sînnâk ruangah kan siah na mi tla
chu tusan ah Bawm cha tlingzar hen rîn leh rêl an tlinh kho ver loh. Chu lawng si lo hen
kan phun lakah phundang umnâk (Inter marriage) lakah mi fa tla chu Bawm cha an rêl
kho ver lo le, sunhsaknâk khawm an nei hen muh a si loh. “Bawm nih anmah hawrawp
hen 99% an rîn leh an rêl kho” tihen S. Loncheu nih a sim (Bawka Rili Vol 2, Phek 3).

3. Muko magazine: Bawm ca in Bible le Khrihfa Hlabu hi zeitik in dah nan ngeih, aho
nih dah a leh?

Keimah: Hi thu deihnâk hi thungai a rokual ka ti. Bawm Bible Translation Committee
masa chem chu kum 1961 ah dirh a si le, chu committee lakah mawhphurhtu tla chu
Bawmram Gospel Centenary Souvenir 2018 lakah Upa Sawnthuang nih a rîn dân hen:

1) Rev. Kualthang, Convener

Bawm phun nih rokual takhen Bible kan nei masa chem mi chu Thawngthang Tha Mark
bu hi a si le, chu chu kum 1967 ah suah a si. A panihnâk suah mi chu Thawngthang Tha
Johan bu 1973 ah a si. Chun, Thawngthang Ṭha Mathai bu chu 1974 ah suah a si.

A veinihnâk ah Bawm Bible Translation Committee chu kum 1969 ah revise a si le, chu
lakah mawhphurhnâk tingtu tla chu:
1) Rev. Kualthang, Convener
2) Rev. S. L. Pardo, Secretary
3) Rev. Thanglian, Member
4) Pastor L. Kapzing, Member
5) Pastor Dirtling, Member leh
6) Pu. Kiplei, Member ti a si.
 Kum 1977 ah Thutlung Thar Bu (New Testament) chu a pumpial hen suah a si rawh
(SIPPI Magazine Vol 9). Chun, Thutlung Thar bu Typist-tu tla chu Pu Rang Lian Al, Pu
Sawnthuang leh Pi Lalliankung an si.

Chu liau hun ah upa dirmunah hawng kan umpiaktu Rev. Kualthang leh Rev. S.L. Pardo
nih mawhphurhnâk tintiang an lâk le, lehlet rian lim tiang hen Pu Shapnawl nih draft
rîntu mawhphruhnâk a ting. Lehlettu member zawzawng tla ṭangrualnâk hen kum 1989
ah Bawm Holy Bible (Old Testament and New Testament) chu Bawm hawlh hen suah
masa chem a si. Chun, Thutlung Li bu suttu (Typists) tla chu; Pi Lalliankung leh Pi Rosy
Elizabeth tla an si (SIPPI Magazine Vol. 9).

Bawm Holy Bible hi kum 2006 ah a veikhatnâk remhṭhatnâk (revise) nei a si le, kum
2018 ah a veinihnâk remhṭhatnâk (revise) nei a si.

“Bawm Labu” hi sut hen kum 1956 ah suah masa chem a si” tihen Bawmram Gospel
Centenary, Souvinir lakah record a si. Sikhawmsele; Labu timhtuahtu Committee leh
lehlettu hi ka fiang lo a si.

4. Muko magazine: Bawm ca in caan hman tein (regularly) in chuahmi Magazine,

Keimah: Kanmah Bawm cha hen Magazine, Journal leh News suah thu ah chun; hi hâwi
a si. Kawhmi nih a pangai (regular) hen an suah tâwn. Sikhawmsele, zatlang ruinâk kan
nei mi tla nih chun, a ekte hen pangai kan suah kho ver lo a si.

Kawhmi kan nei mi ruinâk tangah Magazine mawh Journal a suah mi tla chu hinah ka
hawng târlang na a si.
1) Gospel Cheunâk: Presbyterian Church in Bangladesh (PCB) nih thlasiar
(monthly) hen a suah.
2) Kawhmi Arfi: Evangelical Chriatian Church (ECC) nih thlasiar (monthly) hen a
suah.
3) Nunna Aw: Bangladesh Christian Church (BCC) nih thla thum dan (quarterly) hen
a suah.

Chu lo khawm ah zatlang ruinâk (Social Organization) kan nei mi tla nih an Magazine an
suah mi tla chu:
1) Chinlung Magazine: Bawm Social Council-Bangladesh (BSC-B) nih Yearly a
suah le, a zei mi kum chu suah kho lo hen a um.
2) SIPPI Maganze: The Young Bawm Association (YBA) nih Quarterly hen a suah
le, tu ah chun Yearly hen an suah rawh.
3) Menrihawi Magazine: The Bawm Students’ Organization (BSA) nih Yearly hen a
suah le, a zei mi kum chu suah kho lo hen a um.
4) Bawkarili magazine: Bawm Literature Forum (BLF) nih Yearly a suah le, tu ah
kum zei mawzat suah kho lo hen a um.
 5) Dhaka Aw-Hau: Hi chu Dhaka Bawm House ah sînliau ngâksia tla nih kum siar
an suah tâwn mi a si le, a zeimi kum chu suah kho lo hen a um.

Hi a tlunah târ mi tla chu a suahtu dinghen Committee an timhtuah ver le, Committee nih
a suah tâwn. Committee timhtuah mi tla chu term nei ver a si.

5. Muko magazine: Nihin tiang ah Bawm ca in cauk chuahmi hi zeitluk hrawng dah a
si hnga, zeibantuk phun dah a tam bik (cauk/magazine/journal).

Keimah: Keimah mimal ngeihdan hen Bawmfa chu kan Sakhua Kristian lei kâng hen
thangsonâk a dawmh masa chem mi a si le, Sînnâk (rîn leh rêl), theihnâk, zuamnâk, leh
thenhlimhnâk leikang ah mit deinâk hawng kan pêk. Kristian Sakhua leikang hen ṭhangso
mi phun kan si ruangah kan chabu leh Journal suah tla hi Sakhua leiah mi a tam chem hen
a lang.

Bawm leihen, “Chabu leh Magazine hi zeivial tak me kan suah lai rawh?” ti hi data siah a
si ver lo ruangah sim har ual mi a si. Kawhmi leh zangtlâng ruinâk nih Magazine an suah
mi hi bu 500 tlunah a si lai rawh. Chu hâwihen Kawhmi leh mimal nih Kristian Sakhua
lei kang ah mi chabu, Bawm History, Politict, Lafing, Cultural leh Sînnâk leiah chabu
suah rawh mi khawm hi chabu 200 tlûn chu a si lai rawh tihen ka lung a um. Hi a tangah
mi chabu rîntu tla hi Bawm lakah chabu rîn tam chem mi tla an si.

1) Rev. Lalmuan: Anih hi kum April 1944 ah a suak le, kan dunglei July 16, 2019
ah a thi rawh. Anih nih Kristian Sakhua leiah mi chabu leh Sunday Sikul bu hen
ekte 34 a rîn dih le, PCB nih an suah. Bawmfa lakah chabu rîn tam chemtu a si.
2) Rev. L. Dolian: Anih hi Bawm Bu-Bulbu (Bawm Primer Book) suah masa
chemtu a si. Anih nih sînnâk, Bawm history leh Krisntian sakhua leiah mi ekte
hen chabu 5 a rîn. Bawm lakah mirokual pakhat si. Kum April 1932 ah a suak le,
kan dunglei February 05, 2017 ah a thi rawh.
3) Rev. S.L. Pardo: Anih hi kum 1932 a suak le, kan dunglei February 14, 2002 a
thi rawh. Bawm Dictionary rîn masa chemtu a si.
4) Pastor Zir Kung Shahu: Anih nih Kristian Sakhua leiah mi chabu, History leh
tuanthu la chabu ekte 10 a rîn le, a suah rawh. Tu ah chabu dangdang bu 8 a rîn le,
suah ding mi a nei. Anih hi rîn leh rêl leikang ah thaw theih mi minung a si.
5) Rev. Kiplei: Anih nih Kristian Sakhua leiah chabu leh Sunday Sikul bu hen ekte
chabu 25 a rîn dih le, ECC nih an suah rawh.
6) Rev. Kapkhup: Anih nih Kristian Sakhua leiah mi chabu 9 a rîn dih le, a suah.
Tu kum November 10, 2020 ah a thi rawh.
7) Rev. Lalsang: Anih nih Kristian Sakhua leiah mi chabu 10 a rîn dih le, suah a si
rawh.
8) Rev. Pakshim B.Tlung: Anih nih Kristian Sakhua leiah mi chabu 11 a rîn dih le,
a suah. M.Div. Thesis 1 pakhat a rîn.
9) Rev. Niang Thawn Bawm: Anih nih Kristian Sakhua leiah chabu 4 leh Bawm
tuanthu bu 1 a rîn le, a suah rawh.
 10) Rev. Lalungrual Bawm: Anih hi BD Thesis 1 a rîn.
11) Rev. K. Rema: Anih nih Kristian Sakhua leiah chabu 2 leh Bawm Dictionary bu
a rîn. Chun, BD Thesis 1 a rîn.
12) Rev. K.L. Bawm: Anih hi M.Div. Thesis 1 a rîn.
13) Rev. Lalzarlawm: Anih nih M.Div. Thesis 1 a rîn.
14) Rev. Thimkhup Buiting: Anih nih Kristian Sakhua leiah mi chabu DB Thesis 1 a
rîn.
15) Pu Ramsim: Anih nih Kristian Sakhua leiah chabu Solfa Sînnâk bu a rîn le, a
suah.
16) Pastor Lal Duh Sang Bawm: Anih nih Sakhua lei mi chabu 1 a rîn.
17) Pu Nathan Loncheu: Bawm History bu a rîn.
18) Pu Vannunsiam Bawm: Anih nih Bawm Grammar, Upa Thufing leh Tense bu a
ekte chabu bu 3 rîn le, a suah rawh. Tu ah chabu a rîn liau leh suah ding hen bu 4
a nei.
19) Pu Jacob Bawm: “English Grammar in Bawm Language” tihen chabu 1 a rîn le,
a suah.

Hi a tlunah mi tla hi Bawmfa lakah chabu rîn tam chemtu an si. Mi tamtak a um rih le,
sîngsiah bik a um lo ruangah thungai sim a harsa.

6. Muko magazine: Nan cachuah mi pawl ahhin zei kong tialmi dah a tam bik hnga
(biaknâk, politic, history etc.)

Keimah: Ka sim rawh hâwihen Bawmfa chu kan Kristian Sakhua sînâk lei kang hen
hawng ṭhangso mi kan si. Churuangah, keimah ngaih dân hen kan cha suah lakah a tam
chem mi khawm chu kan lungnâk, kan Sakhua Krist thawngthang a si. A panihnâk ah
chun, kan thawngthang, kan tuanthu (History) leh sînnâk hi a hawng si lai. Political thu
ah chun, Bawm nih kan cha rîn hi thungai a tâwm rih hen a lang.

7. Muko magazine: Bangladesh ah Bawm miphun nihin ah zeitluk dah nan um, nan za
tein Bawmca le holh nan thiam dih maw?

Keimah: Chittagong Hill Tract ah tlangmi um mi phun 11 (Bawm, Pangkhua, Lushai,

Bangladesh Government Census 1991 ah lâk dân hen Bawm minunglu hi 6,978 langh a
si. Chun, BSC-B nih kum 2003 ah rêl dân hen Bawm minunglu ekte 9,461 cho a si
(VAPUAL Magazine, published by Bandarban Area BSA 2004). Kum 2011 ah
Bangladesh Governtment nih minunglu rêl nawlhnâk a nei nawlh a si. Chu lakah chun,
Bawm minunglu hi ekte 11,637 cho langh a si.

Bawm ṭhaliau (YBA) tla nih kan Bawmfa minunglu rêl leh sîngsiah mi tla hi
zumhmeihnâk tâwm a nei le, April 2014 thawk hen Bawmfa minunglu rêl chu ṭhaliau
murui tla nih a dawmh le, November 2014 ah minunglu rêl a lim. Hi Bawmfa minunglu
 rêlnâk lakah YBA nih tawng dân hen khua 70, Indawng 2,420, mipa minunglu 6,246 leh
nunau minunglu 6,121 hen ekte 12,367 a si. Tu kum 2020 ah Bawm Census chu BSC-B
nih a lak nawlh le, result suah a si lo rih. Tukum 2020 ah chun, Chittagong Hill Tracts,
Bangladesh ah Bawmfa ekte 20000 tlunah kan um rawh ding hen a dawh.

Bangladesh ram sungah um mi Bawmfa nih chun Bawm hawlh chu kan ekte nih kan
thiam ver ko rih. Sikhawmsele, kan lakah phundang umhnâk (intermarriage) hi tâwm tite
a um bâk rawh le, phundang hen umhnâk lakah mi te-le-fa tla chu Bawm hawlh hi
tlingzar hen an thiam ver lo rawh. Chun, kan te-le-fa mun dangdang ah hun sawt tak um
mi tla khawm nih kan Bawm hawlh hi tlingziar hen a zeimi nih chun an hawlh kho lo a si.

8. Muko magazine: Hmundang le ramdang ah teh Bawm miphun hi zeitluk hrawng

Keimah: Kan sim rawh hâwi hen tu kum 2020 ah Bangladesh ram sungah Bawmfa
20000 tlunah kan um rawh ding a dawh. Mizoram ah Bawmfa um mi tu hun ah Census
lâk liau a si le, December 2020 sungah Census chu dih ding an lung a um. MBSA
President Pu Ecclecya Leihang simdân hen tu kum 2020 ah Mizoram sungah Bawmfa
minunglu 20000 – 23000 karah an um ding lungumnâk thu a sim. Chun, Chin State,
Myanmar ah hin Bawmfa minunglu 600/700 tlun ding ko an um. A san chu politic
harsatnâk ruangah Myanmar ram sungah mi Bawm khua tamtak a chu a rawk le, kan
unau Mizoram ah an ṭiau. “Bawm” tihen kan a sal mi hi tu hun ah ekte minunglu 43000 –
45000 karah kan si lai.

Ka ngeihnâk hen Bangladesh leh Myanmar ram sungah Bawm um mi chu Bawm hawlh
rîn leh rêl thiam leh hawlh kho thu ah chun, 100% si lai. Kan unau Mizoram ah Bawm
um mi tla chu, “80% - 85% karah Bawm hawlh an hawlh kho, 70% - 75% karah Bawm
leihen an rîn kho leh an rêl kho leh 90% nih Bawm hawlh an theih kho lai” tihen Pu
Ecclecya Leihang, Mizoram Bawm Students’ Association (MBSA) nih a sim. Ram
dangah tâwm tite Bawm kan um rih mi London, USA leh Canada ah mi an fa tla chu
Bawm hawlh hi an thiam lo rawh.

9. Muko magazine: Bawm caholh (literature) le Nunphung (culture) tlau lonâk ding ah
zeitindah zuamnâk le riantuannâk nan ngeih?

Keimah: Bawm hawlh-le-rîng (Literature) leh nunphung (Cultural) kan thlau lonâk
dinghen Bawmfa nih kâng dangdang hen zuamnâk leh thangsonâk dangdang kan
timhtuah a si. Chu lakah a biktak hen Kawhmi murui tla nih mai hawng kan ruai le, kan
hawlh hen Bible leh Labu tla mang kho hen hawng kan um pi. Chu lawng si lo hen
Kawhmi nih Magazine tla an timhtuah mi tlakah kan Bawm thawngthang leh dirmun tla
an rîn.
 Chu hâwihen kan zatlang ruinâk: BSC-B, YBA, BSA leh BNM nih khawm Quarterly leh
Yearly Magazine an timtuah mi lakah Bawm phun thangsokhonâk dinghen fawrhnâk thu,
kan nunphung leh kan hawlh-le-rîng duan tla an rîn le, an tlang zanh.

Kan lakah mithiam tla nih chabu dangdang an timhtuah mi lakah kan hawlh-le-rîng leh
nunphung, kan tuanthu, kan thiamthu leh lafing tla an rîn.

Rîn hen sîngsiah mi lawng si lo hen, YBA nih kan phung-le-lam pang leh La zuamnâk tla
kum siar hen zuamnâk an timhtuah le, sîntirnâk an pêk. A biktak hen kan thuamthil
(dress) tla hi a lân ngâkhen kan uar rawh a si.

10. Muko magazine: Bawm ca le Laica hi zeitluk hrawng dah an i khat ko tiah tiah na
ruah (%)? (30%, 50% 60% etc.)

Keimah: Bawm cha leh Lai cha 30%, 50% 60% si lo hen 90% ding a bang mawh a khat
lai. Bawm hawlh chu Lai hawlh nget ko. Chu hâwihen Lai hawlh chu Bawm hawlh nget
ko a si. Hinah, Bawm hawlh leh Lai hawlh kan ti mi lakah Thiltih Phur (Prînciple Verb)
chu a bang tuk. Sikhawmsele, Thiltih Bawmhtu (Auxiliary Verb) lakah Bawm hawlh leh
Lai hawlh kan ti mi thumal (word) tâwm tite a danglamnâk a um cho a si.

Thawngthang laknâk:
1. Chêunâk Vol. 5, 1952
2. SIPPI Magazine Vol.9, Published by the Young Bawm Association (YBA)
3. Bawka Rili Vol. 2, Published by Bawm Literature Forum (BLF)
4. Pu Vannunsiam Bawm: Basic Bawm Grammar 2018
5. Bawmram Gospel Centenary Souvenir, 2018
6. Bangladesh Census 1991
7. Record book: ECC nih Official hen lasuibu suah mi leh a rîntu tla (Unpublished)
8. Personal Interview with Pu Ecclecya Leihang, President, MBSA, Pastor Lalruatlian, ECC
leh Pastor Ro Tawn, Myanmar.