自序
詩 ê 自助旅行
這本是我 ê 第 19 本詩集。
若是出去旅行一逝，就會當寫出一本詩集，按呢真正會寫傷濟詩。佳哉，干焦詩家己ê 自助旅行才有法度寫出伊 ê 詩集。人 ê 自助旅行無彼號才調。我是真愛旅行 ê 人，干焦這遍寫出一本詩集，若 m̄ 是詩家己去旅行，詩家己自動寫作 ê，beh 按怎解說？
AI 寫作是一款自動寫作，這本詩集 mā 是一款自動寫作。我 tī 2022 年10 月 kap 阮某去 Seattle 查某囝 in 兜蹛一個月。有兩个週末，in 翁仔某有tshuā 阮去附近 ê 景點迌。其他ê 時間，in lóng 愛上班真無閒，阮有時坐公車去華盛頓聖大學校園 lau-lau 踅踅 leh，有時去附近 ê 湖邊散步。我 ê 單眼相機翕真濟相片，手機仔 mā 翕 bē 少。轉來台灣，遮 ê 相片就家己自動寫作，我 suah 變做 AI。逐工透早，倒 tī 眠床頂，看手機仔內底雲端 ê 相片。相片就瞬間變做詩，我隨 kā 寫 tī手機仔裡，隨掛相片 kā phoo tiàm 彼工 ê 人面冊迷眾頁。一工有時寫三首，有時寫二首，有時一首。兩個月落來，竟然寫 kah 75 首。
其實遮 ê 詩無算是「旅行 ê 詩」，較成是「詩 ê 旅行」，詩 ê 自助旅行。若是旅行 ê 詩應該描寫旅行彼个所在 ê 景緻，hōo 讀詩 ê 人敢若綴你去旅行。我遮 ê 詩 lóng 是逐首詩有伊家己獨立 ê 思考，家己 uì 相片內底走揣性命 ê 意義。透過旅行，透過翕相，寫出我對人生 ê 觀察 kap 想法。
阮查某囝嘉宜 tī Seattle 附近揣著心理醫師 ê 工課，阮囝婿 John tī Microsoft 食頭路，in 拄結婚一個外月，阮就自助旅行來到 in ê 新厝。In ê 結婚典禮設計 tī 森林內底，新房 tī 樹屋頂，mā 有替阮款一間樹屋。可惜彼陣台灣 Covid 19 疫情當 teh 滾絞，阮只好 kā 機票退掉，無法度去參加 in ê 婚禮。等台灣會當出國ah，就緊來 kā in 祝福，分享 in ê 喜氣。遮 ê 詩會自動寫出來，會來自助旅行，我會變做敢若 AI，逐張相片 lóng 瞬間化做詩，無定是因為去 hōo in ê 雙喜沖著 ê 緣故!
我 kā 詩集號做「秋旅速描」，無叫做「秋旅素描」，是因為速度真正真緊，逐首詩 lóng 是速成 ê。希望透過我翕 ê 相片，讀者會當入來我 ê 詩自助旅行，體會我自動寫作 ê 快樂。
感謝畫家顏聖哲為我這本詩集 ê 30 首詩寫字畫圖，促成「李勤岸顏聖哲詩畫展」。第一站 tī 彰化台語文創意園區展出。感謝姚資政嘉文兄 kap 周前縣長清玉姊 in 翁仔某 ê 支持。感謝文化部長李遠撥駕來剪綵致辭。彼一工同時詩畫展開幕，詩集新冊發表會。我 kap 南二中 ê 學長大畫家顏聖哲合作，伊為我 ê 30 首詩畫圖，我為伊 ê 30 幅圖寫詩。30 幅 ê 字圖害伊寫kah 目睭強 beh 青盲去。伊 ê 圖，我寫一下 suah 超過頭重倍，寫 60 首。變做另外一本詩集《山水詩畫四季》。向望伊寫 ê 字圖，我寫 ê 配詩，會當另外 koh 出 1 本詩畫集，另外 koh 辦一場詩畫展。台語詩應該愛迒界多元演出。這是台語詩 kap 藝術做伙踏出來 ê 一小步。寄望文化部會當 tī 第一站展 suah 了後，接續安排去全國台灣文學館巡迴展覽。期待！
感謝林興華提供伊 ê 畫來做這本詩集 ê 封面。這是雙封面 ê 設計，林興華 ê 圖會當單獨提出來框，吊 tiàm 客廳，mā 是另類 ê 詩畫展。
感謝淑鳳用心為每一首詩做語詞註解 koh 翻寫羅馬字，這本詩集有附我朗誦 ê QRcode，讀者會當看著華語註解，台語羅馬字，koh 有我 ê 台語朗誦、我翕 ê 相片配圖，按呢應該 bē 當 koh 講台語詩讀無 ah lah！
遮 ê 詩 lóng 有 tī 自由時報副刊、臺江台語文學、海翁台語文學、台文通訊罔報、台灣教會公報 kap 幼穎台語文學刊登過。勞力！
2024.9.17 台北和室，中秋節
天天爆殺 
今日66折 
博客來
博客來
博客來
博客來
博客來
常見問題
線上客服
客服信箱
