73岁郑则仕讨厌求人庆幸子女冇入行 开明老窦唔恨抱孙公开家庭和睦秘诀丨独家
2024-05-23 07:00 
73岁郑则仕（Kent）在《神耆小子》饰演刻薄专横富商「钱大海」，他开心跟一班新合作后辈相处愉快，又大赞初次合作的冼靖峰（Archie）很有天份又勤力，给予高度评价。「钱大海」跟子女关系极差，不过Kent哥现实跟一对仔女非常融洽，又庆幸他们没兴趣入行，免得要求人帮手。对于退休，Kent哥强调「仲有能力点解要退休？！」相当有型。采访：杜杜 摄影：朱伟彦
Kent哥返TVB拍《神耆小子》，大部份对手均是新合作，他相当兴奋，「我系僵尸状态，有段时间冇吸新鲜血就会谢，打回原型变死尸，我打紧柴要吸啲血令自己复活，呢个剧好处系畀咗好多新鲜血我吸，首先系Archie 24岁热辣辣热血，先索咗佢先，樊亦敏、曹永廉、萧正楠都有唔同温度嘅血，今次合作好开心，佢哋带我行得好舒服。」
对冼靖峰期望大
Kent哥特别点名赞初次孭重飞的Archie，「有一场4页纸好硬嘅戏，想拍时唔见咗佢，原来佢练咗两个几钟，佢都知嗰场戏紧要，但一对戏唔对路，出唔到个感觉要调整情绪同对白，佢做唔到，我话唔紧要同导演讲不如食咗饭先返嚟拍，佢冇食饭喺度练，食完饭落嚟半个钟左右，再拍1 take过OK，唔系讲笑难度好高，首先佢有天份，好勤力，有天份又勤力，衰极有限。」他更给Archie好高分，「佢所有嘢都好好，75分系对佢评价，或以上就系对佢个人。」他坦认很少赞人，对Archie期望好大，「希望见到佢好，我拍咗咁耐剧，基本上未讲过『希望佢好』，除咗《荷里活有个大老千》王子涵，晶哥（王晶）个女有呢种能力，表达得好，我对Archie有好大信心。」
抱孙由仔女作主
戏中Kent哥跟仔女关系极差，现实中跟分别是33岁女儿和27岁儿子的关系就刚相反，「唔可以用非常甜蜜嚟形容，我会用非常融洽。」他跟仔女相处没秘诀，只得一招身教，「你做啲嘢会感染到佢哋，你讲一套做一套，教佢唔好讲大话，自己不停喺佢面对讲大话踩人，仔女日日听到，点会听得入耳，身教好紧要，最基本开始唔系社会教育，系家庭教育。」两名子女都已婚，长女依洛在科大毕业，跟丈夫定居上海做Marketing，细仔英国大学毕业返港做会计，婚后跟他同住。开明的他认为抱孙由仔女作主，「我生仔我养仔系应该嘅，唔希望我要养孙，问题系佢哋有能力又想，咪做罗！唔好话恨啦，以前旧嘅思想咪会恨，我唔会恨，有会好开心拍烂手掌，冇都开心，因为佢哋知道自己选择嘅路。」
冇谂过几时退休
Kent哥长女依洛11岁时，曾跟他在亚视剧《法内情2002》合演父女，初次演戏已表现出色，「坦白讲我个女真系有天份，佢客串7日，我完全谂唔到佢好自然讲到对白，嗰时佢好有兴趣，我一开工佢走去望住个mon几个钟。」后来试过其他工作，女儿便转軚，而儿子从来冇兴趣做幕前，令他放下心头大石，「我个仔喺现场几分钟，就即刻标上车话『好热呀，我唔去嘞！』好罗！两个都唔想做呢行（鼓掌），恭喜自己，我唔想求人，自己都唔求人，要为仔女去求人，我觉得好冇面。」而且他认为入行都要讲资质，「有天份又勤力，喺呢行就有希望，先好踏只脚入嚟，如果呢两样嘢都冇，sorry bye bye啦！」
入行近50年，Kent哥谓会做到死先退休，「我有能力点解要讲退休啫？！如果仲有人搵我，观众亦都接受我，咪一路生存落去罗！」他更加不想用退休的方向行未来的演艺路，「唔好谂几时退休，谂有冇能力先，呢行有个特点系好现实，你有能力有价值先至有人叩你门，我喜欢现实，因为会话畀我听我有冇能力同价值。」
《星岛申诉王》推出全新项目「我要赞佢」栏目，现诚邀市民投稿赞扬身边好人好事，共建更有爱社区。立即「我要赞佢」︰https://bit.ly/3uJ3yyF
想睇更多精彩内容，请立即浏览「区区有申诉」活动专页，https://bit.ly/41hgS9E
《星岛头条》新网站有更多精彩内容：http://www.stheadline.com/
最新回应