世界杯2022｜专家分析:心态决定法国衞冕命运
2022-12-16 09:00 
法国两球净胜摩洛哥杀入决赛，近乎破晒以往衞冕冠军嘅不利数据，认真唔简单。
「高卢鸡」入嘅两球波，睇到基利安麦巴比嘅作用不单止系边路爆破，上半场迪奥靴南迪斯喺小禁区左边嘅入波，同埋下半场后备入替嘅高路梅安尼后上入楔嘅入波，都系因为麦巴比将个波推向中路，并引嚟至少四个摩洛哥球员防守，令边路球员多咗空位进攻。当然，两球入波有少少运气成分，但不得不赞法国嘅呢个部署。
不过，艾尔发现法国近仗出现唔少问题，今届世界杯法国选入皇马新星曹亚文尼，整体表现一般，尤其防守贡献唔大，另一位中场尤索夫科芬拿表现同样失色。至于满场飞嘅基沙文当然值得一赞，但要由一位进攻球员不断回防，再引球推进组织攻势，呢个情况唔太理想。睇下拉比奥特下场能唔能够复出，佢对球队中场拦截非常重要。
另一个更致命嘅问题，系法国上下半场判若两队。法国上半场有十次射门，但下半场只得四次，而下半场嘅控球比率只有三成四。法国下半场完全唔做前场紧逼，防綫拉到好后，任由摩洛哥组织攻势。摩洛哥下半场射门次数达九次，边路攻势排山倒海，唔系把握力差少少，法国未必踢得咁轻松。
呢队由迪甘斯带领嘅法国，不时出现赢紧就缩嘅情况。唔系话无时无刻都要踢得进取，但全队缩得太后，令后防不断受压，绝对唔系好事。下场生死一战，法国对住机动力同把握力好强嘅阿根廷，如果迪甘斯依然采取呢种睇定嚟食嘅踢法，随时断送大力神杯。 -艾尔
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
關鍵字
最新回应